7 March 2025

Мәңгілік мейірімнің символы

Ана – бұл тек өмір сыйлаушы ғана емес, ол – адамның ең алғашқы ұстазы, оның мінез-құлқы мен дүниетанымының қалыптасуына тікелей әсер ететін қайталанбас тұлға. Ана махаббаты – шексіз, оның мейірімі – сарқылмас қазына. Адамзат тарихында ананың рөлі ешқашан төмендеген емес, керісінше, ол өркениеттің негізі ретінде қарастырылады.

Ананың перзентіне деген сүйіспеншілігі – өзіндік шартсыз махаббаттың ең биік үлгісі. Ол баласы қандай жағдайға тап болмасын, оны қорғауға, қолдауға және демеуге үнемі дайын. Ғылым мен өнерде, саясат пен мәдениетте табысқа жеткен қаншама ұлы тұлғалар өз жетістіктерін ең алдымен ананың тәрбиесімен байланыстырады. Себебі анадан алған рухани азық – адамның болашақта кім болатынын, қандай құндылықтарды ұстанатынын анықтайтын басты фактор.

Ананың рөлі тек отбасы шеңберінде ғана шектелмейді. Ол – қоғамның тірегі, мәдениеттің сақтаушысы. Ұрпақ сабақтастығын қамтамасыз ететін де, ұлттық руханиятты ұрпағына сіңіретін де – ана. Қазақ халқының «Ана бір қолымен бесікті, бір қолымен әлемді тербетеді» деген сөзі осы ұлы міндеттің айқын дәлелі.

Бүгінгі жаһандану дәуірінде ананың тәрбиелік миссиясы бұрынғыдан да маңызды бола түсуде. Материалдық құндылықтар басымдыққа ие болған заманда рухани кемелденудің маңызын бала санасына сіңіру – ананың басты парызы. Өйткені адамгершілік пен ізгілік, махаббат пен мейірім, әділдік пен адалдық сияқты асыл қасиеттер ең алдымен ана сүтімен беріледі.

Ана – тек отбасының ғана емес, тұтас қоғамның тірегі. Оның жүрегіндегі жылулық, мейірім мен махаббат – адамзаттың игілігіне қызмет ететін сарқылмас қайнар. Ананы құрметтеу, оның еңбегін бағалау – әрбір саналы адамның парызы.

Авторы: Аймина Фархад